النساء روح المساء=والليل لـو فكـر يبـات
كان ما فيـه أغنيات=وكـان مالـه ذكريـات
وكان مافينـا عظيـم= ومـا لأمانينـا حليـف
وما بنا قلب وليـف=ولا لنـا قصـد شريـف
النساء نصف الحياة= إلا النسـاء كـل الحيـاة
آه يا أسرار الخـوات=آه يـا أحـلام البنـات
آه يا الطيش الطفولي= آه يـا الحـزن الشفيـف
آه يا لعشق العفيف= آه يـا لجنـس اللطيـف
علمـن حتـى المرايـا= والشبابيـك اللـغـات
والرسايل والدواة=صـارت أعـذب مفـردات
كم بكن وانكف مبصر=وضحكن وأبصر كفيـف
وارمشن واهتز سيف= وهمسن وامتد ريف..
كم غدن لاخوانهـن =عـزوة صناديـد عصـاة
بين صفق المرهفات= وبين ضبـح العاديـات
طاحت أشناب وكراسي= وانطلق دمـع ونزيـف
واعتلى الخـف المنيف=والمقابـر تستضيـف
في بـلادي يحسبـون= ان النسـاء متخلفـات
في المساء مستوطنات=وفي الضحى مستعمرات
مادروا عن هالبيارق= شمخ العـرض النظيـف
فزعة الديـن الحنيف=شجـرة العـز الكثيـف
النساء ضلع عـوج =لـولاه كـل العـدل مـات
مالهن عنـا فـوات=ولا لنـا عنهـن غنـاة
تبرق الدنيـا علـى= يديهـن ويغريـن القنيـف
نطمع بتكريم ضيف=ونوقـف بيـوم عصيـف
النساء مـوج علـى =بحـره منايـا وامنيـات
والنسـاء مركـب نجاة=نسـأل الله الثـبـات
هن لباس وهن فراش= وهن معاش وهن رغيف
ان فتك جوع مخيف= وان حـدا الرجـال حيـف
النساء حتـى شـراب =الجنـة العـذب الفـرات
تحت ماطـا الأمهات=يالهـن مـن مكرمـات
كلما عوّد من الكـد =أقبـل ابـن آدم ضعيـف
له ورا البيبان طيف=مثـل نسنـاس المصيـف
كم مكان يعرض =أعـراض آنسـات وسيـدات
والهـوى لـه بايعات=والغـلاف ولـه فتـاة
والحسن تشبير عنق =وطـول وخصـر نحيـف
وشئ ماينشاف شيف=لاجـل الأول والوصيـف
شهب تشابـه رسـوم= الشاشـه المتحركـات
ما لزمتهـن طـراة=ولا لهـن ملـح وحـلاة
لاربيع فيـه خيـر =ولا بـه الا بـروق صيـف
والشتاء مابـه رفيف=يحيـي أوراق الخريـف
غـادة وسجـادة وكفيـن =وحجـاب وصــلاة
من صبايـا محصنات=مـن عـروق طيبـات
أطهر من الفيـن منظـر= كلهـا فتنـه وزيـف
في رجا الصبح الكسيف=واجرة الليل السخيـف
لي مناحـل لـي خلايـا= كلهـا سكـر نبـات
لي حصون ناعمات=لـي غصـون شامخـات
لـي قواريـر ملاهـا= العقـل والـدم الخفيـف
خلفها العمر الكليف=ودونهـا الحـد الرهيـف
يازمن وش جـاب =حلـوى غلفوهـا بالعبـاة
جنـب حلـوى للمشاة=وللغبـار وللشـتـات
شف بدل ماهي لواحد= صـارت لجمـع لفيـف
كيف أنا أخبرك كيف؟=شوفهـا فـوق الرصيـف